تبلیغات
متن كتاب های آموزشی

متن كتاب های آموزشی
همیاری 

اصیل  بایاتی لار

برگرفته شده از: سررسید آذربایجان1388  

 تالیف حسن ضیایی جباری

تایپ از: علی اكبر ادهم       دیماه 88

 

خوشدور یارین دورومی                  اتورومی، دورومی

گونومو قارا ائیلیر                          لیللندیریر، دورومی

                                                                  

اوجا داغدا قار، قالار                      قیش قار اوسته قار، قالار

قیشدا بولبوللر اوچار                     های كوی سالار، قارقالار

 

اولمایاسن اسیر سن؟                            سؤیود كیمی اسیرسن!

عؤمورون، گونون كئچمه یه             بو قده ر تله سیر سن؟

 

ائل اوبادا بایاتی                           گوللندیرر حایاتی

ائلین اوره ك سؤزودور                    بایاتی نین بایاتی

 

بولاقلار خزه لندی                         آغاجدان خزل اندی

سن گلدین گولدو چیچك                روحوموز تزه لندی

                  

چالیش ائللر سایاغی                             سای قرانی، سای، آغی

آغ، قارادیر پیس گونده                            بیر بیری نین دایاغی

 

عاقیل آدام قورولماز                      سن بورماسان بورولماز

ایش لر گره ك قاریشا                    بولانماسا دورولماز

 

بو قالا داش قالادی                       داش اوسته داش قالادی

بابكین داش قالاسی                     هامیدان باش قالادی

 

شیرین دیللی آچارام                     هر قیفیلی آچارام

دیش ایله یوخ، دیل ایله                 هر قیفیلی ، آچ، آرام

 

بورا گؤزه ل آدادی                         گؤزللیك بورا دادی

آغیزلاردان داد گئدیب                    ایندی هر زاد، آدادی

 

من گئتدیم گؤزوم قالدی                 گؤزونده گؤزوم قالدی

اورك دؤزه بیلمه دی                      تك منه دؤزم ، قالدی

 

گتیرمه یین پول، آدی                     ایندی هر زاد، پولادی

پولسوز پولاد اولسادا                     پول اریدر پولادی

 

سن دریادا اوزه لی                       اللریو وار اوز، الی

هر كس وفاسیز اولسا                            اللریندن اوز، الی

 

اینسانلار كیمی یاشا                    باخما قورویا، یاشا

اینسانین سعادتی                       باغلانیبدیر تلاشا

         

داش آتما قوشا دئیر                      داش قارانقوشا، دیر

قارانقوش یاز قوشو دور                  بیری یوز قوشا دیر

 

آیریلماز بالدان آری                        كام آلار بالدان، آری

نار گولوندن بال اولسا!                            یییه ریك بالدا، ناری

 

گتیرمه اینسان آدی                      بو توهین اینسانادی

اینسان قوشلاردان آلماز                تانری وئرن قانادی

 

بوگول عطیر كانی دیر                    عطیرچی توكانی دیر

قیزیل گول قورویان                        اونون اؤز تیكانی دیر!

 

ایت آتینان قوووشماز                     آت ایت ایله قوووشماز

اصلین ایتیرن اینسان                     اینسان ایله یوووشماز

 

درده ده آخار سو، وار                    آپار باغلاری سووار

ایشلر ترسه دوشنده                    دووار بنانی، سووار

 

بو داغلار آلمالی دیر                      آلماسی آلمالی دیر

بابكین داش قالاسی                     مینلر ایل قالمالی دیر

 

سن یوخولو، بیز، آییق                             هامی یاتیب بیز آییق

بیز ایشیق آختاریریق                     سیز گون اولساز، بیز آییق

 

چالیش ائلی بیر ائله                     مین ائلی ییغ بیر ائله

اوره كلر بیر لشمه سه                  باتا بیلمز بیر ائله

 

چالیش خالقا دایاق اول                 ال اله وئر آپاق اول

تك ال ایله ایش آشماز                            قوللارینا، دایا، قول

 

هر گول بیر گون سولان دیر             آز گوزلری، سولاندیر

دئمه فلكین چرخی                       بیزی درده سالان دیر

 

نوغولو وئر اوغولا                          قوی آغزیندا اوغولا

اوغول درده دیمه سه                    اوخشایاجاق او، غولا

 

یات دئمه میش یات،‌آنی                آییلد مازلار یاتانی

یاتانی عزیزلر لر                           بو زمانه نی ، تانی

 

قوردون اتین قورد یییر                    توت یاپراقین قورد یییر

آلما،‌هئیوانی، ناری                       اؤز ایچیندن قورد یییر

 

كیشی دئمز بوی ، آقا                             بویانما هر بویاقا

اؤزگه نی آلچاق سایان                  اولماز اوجا بوی ، آقا

 

دوشنده بركه بوشا                       غمی غصه نی بوشا

حسرتین طلاقین وئر                     الین چیخمامیش بوشا

 

گوندوز اولاجاق گئجه                     گئجه قالانماز گئجه

آمما گوندوز یاتانا                          گوندوز اولاجاق ، گئجه

 

بو دونیا بیر آینادیر                         اینسانلاری اوینادیر

غفلتده یاتان اینسان                     بیلمز گون، ایل، آی، نه دیر؟

 

اولسون كی حق آجیدی                ائل حقیقت آجیدی

محبت لی شیرین دیل                            هر دردین، علاجی دی

 

یاریم یادا سالماسا                       قاچمالییام سلماسا

قارا قیش گله بیلمز                      قیزیل گوللر سولماسا

 

تاپشیر مایین اوشاغا                    باشین سالسین آشاغا

آناسی سود، ده وئرمز                            آغلامایان اوشاغا

 

ساخلاما بیر ایل غمی                            قویما یئسین ائل غمی

اینسان اؤز غمین یئمز                            اگر اولسا ایل غمی

 

اینسان بیر گون قوجا لار                جاوان لاشماز، قوجا لار

آزاد یاشایان اینسان                      قوجالدیقجا اوجالار

 

خیال قوشو قاناد سیز                             قوش اوچامماز قاناد سیز

یاراشیقلی ائل اوبام                     سیز منه قول قاناد سیز

 

بو بیر باغدیر آلمالی                      عؤمور ده گیل، آلمالی

اینسانلار گئدر گیدیر                     تك اینسانلیق قالمالی

 

گله جك خبر، ایندی                      سنین نه خبریندی؟

باشار خوش خبر گتیر                    دونیا خوش خبریندی

 

قولاق هر گون ائشیدیر                  دوز ایش كیشی ایشی دیر

ناكس دیر چؤرك كسن                            چؤرك وئرن كیشی دیر

 




طبقه بندی: اصیل بایاتی لار1،
[ جمعه 20 تیر 1393 ] [ 11:05 ق.ظ ] [ علی اكبر ادهم ماراللو آموزگار ششم ]
.: Weblog Themes By Iran Skin :.

درباره وبلاگ

موضوعات
آمار سایت
بازدیدهای امروز : نفر
بازدیدهای دیروز : نفر
كل بازدیدها : نفر
بازدید این ماه : نفر
بازدید ماه قبل : نفر
تعداد نویسندگان : عدد
كل مطالب : عدد
آخرین بروز رسانی :

فروش بک لینکطراحی سایتعکس